Në Ditën Kombëtare të Diasporës, Kuvendi i Shqipërisë ka miratuar ligjin e ri që synon të ridimensionojë tërësisht angazhimin e institucioneve publike ndaj bashkëatdhetarëve tanë nëpër botë.

Ky ligj i ri vjen si një zotim për ta vendosur diasporën në qendër të politikave të zhvillimit ekonomik, kulturor dhe shoqëror.

Ministrja për Evropën dhe Punët e Jashtme, Elisa Spiropali, e cilësoi këtë akt si një moment mirënjohjeje dhe krenarie kombëtare.

“Shqiptarët e diasporës janë zemra jonë që rreh larg atdheut, por gjithmonë në të njëjtin ritëm,” u shpreh ajo, duke theksuar se suksesi i shqiptarëve jashtë vendit është një burim i vazhdueshëm frymëzimi për Shqipërinë.

“Sot, në ditën e saj, miratuam në Kuvend, Ligjin për Diasporën, që ridimensionon angazhimin e institucioneve publike për vendosjen e diasporës në zemër të zhvillimit ekonomik, kulturor dhe shoqëror të Shqipërisë. Shqiptarët e diasporës janë zemra jonë që rreh larg atdheut, por gjithmonë në të njëjtin ritëm, me një burim frymëzimi, suksesi dhe krenarie kombëtare. Gëzuar Ditën Kombëtare të Diasporës, simbol i unitetit, trashëgimisë dhe identitetit shqiptar”, shkruan Spiropali në rrjetet sociale.

/rtsh.al/